میانوالی( نئی تازہ رپورٹ) کائونٹرٹیررزم ڈیپارٹمنٹ (سی ٹی ڈی) نے مکڑوال کے قریب کارروائی کر کے میانوالی کو بڑی تباہی سے بچا لیا، سی ٹی ڈی اور دہشت گردوں کے درمیان فائرنگ کےتبادلے میں فتنہ الخوارج کے 7 دہشت گرد ہلاک ہوگئے جبکہ 8 دہشت گرد اندھیرے کا فائدہ اٹھاتے ہوئے فرار ہوگئے۔
ترجمان سی ٹی ڈی کے مطابق کارروائی انٹیلیجنس کی بنیاد پر کی گئی، سی ٹی ڈی اور دہشت گردوں کے درمیان شدید فائرنگ کا تبادلہ ہوا، دہشت گردوں نے سی ٹی ڈی ٹیم پر فائرنگ کی فائرنگ کے تبادلے میں 7 دہشت گرد اپنے ہی ساتھیوں کی فائرنگ سے ہلاک ہوگئے جبکہ 8 اندھیرے کا فائدہ اٹھا کر فرار ہو گئے۔
سی ٹی ڈی ترجمان کے مطابق دہشت گردوں سے چھ دستی بم، سیفٹی فیوز وائر، سات کلاشنکوف ، گولیاں اور بارودی مواد برآمدہوا، فرار ہونے والے دہشت گردوں کی گرفتاری کے لیے سرچ آپریشن شروع کر دیا گیا ہے۔
یہ بھی پڑھیں :پنجاب میں 72 مقدمات میں ملوث جیلا ڈکیت اپنے ساتھیوں کی فائرنگ سے مارا گیا
ترجمان نے بتایا کہ کہ سی ٹی ڈی ٹیموں نے مکڑوال کے قریب ناکہ بندی کرلی جبکہ ہلاک ہونے والے دہشت گردوں کی شناخت کا عمل جاری ہے انہوں نے کہا کہ دہشت گرد میانوالی میں بڑے حملے کی منصوبہ بندی مکمل کر چکے تھے لیکن سی ٹی ڈی نے کارروائی کر کے میانوالی کو بڑی تباہی سے بچا لیا۔
