اسلام آباد( نئی تازہ رپورٹ) اسٹیبلشمنٹ ڈویژن نے سرکاری ملازمین کے لیے ریٹائرمنٹ کی عمر 60 سال سے بڑھا کر 62 سال کرنے کی تجویز پر رضا مندی ظاہر کر دی۔
ذرائع کے مطابق وزارت خزانہ کی اس تجویز کا مقصد پنشن کی ادائیگیوں کے بوجھ سے وقتی طور پرٹالنا ہے۔
میڈیا رپورٹ کے مطابق وزارت خزانہ نے اسٹیبلشمنٹ ڈویژن کو 3 نکات پر مشتمل سمری بھجوائی تھی،جن میں پنشن کا شمار سروس کے آخری تین سالوں میں لی جانے والی تنخواہوں کے مطابق کرنے اور قبل ازوقت ریٹائرمنٹ لینے پر پنشن میں 3 فیصد کٹوتی کی تجاویزبھی شامل تھیں تاہم ان دونوں تجاویز کو اسٹیبلشمنٹ ڈویژن نے مسترد کردیا۔
اسٹیبلشمنٹ ڈویژن نے سرکاری ملازمین کی ریٹائرمنٹ کی عمر 60 سال سے بڑھا کر 62 سال کرنے کی تجویزمنظورکر لی تاکہ وقتی طور پر خزانے پر ادائیگیوں کے بوجھ کو ٹالا جا سکے۔ اسٹیبلشمنٹ ڈویژن نے اس حوالے سے آفس میمورنڈم جاری کیا ہے۔
ذرائع کے مطابق وزارت خزانہ اسٹیبلشمنٹ ڈویژن کے آفس میمورنڈم پر وزارت قانون اور اقتسادی رابطہ کمیٹی (ای سی سی )سے منظوری لینے کے بعد وفاقی کابینہ کو سمری بھجوائے گی، جس پر کابینہ حتمی فیصلہ کرے گی۔
