سنگاپور( نئی تازہ رپورٹ) بین الاقوامی ریٹنگ ایجنسی موڈیز نے خدشہ طاہر کیا ہے کہ پاکستان آئی ایم ایف پروگرام کے بغیراپنے انتہائی کمزور ذخائر کی وجہ سے ڈیفالٹ کر سکتا ہے ۔
موڈیز کے تجزیہ کار کےمطابق پاکستان رواں مالی سال( جون تک ) اپنی بیرونی ادائیگیوں کو مکمل کرے گا، تاہم جون کے بعد پاکستان کے پاس فنانسنگ کے آپشنز انتہائی غیر یقینی ہیں، آئی ایم ایف پروگرام کے بغیر پاکستان اپنے انتہائی کمزور ذخائر کی وجہ سے ڈیفالٹ کر سکتا ہے۔
موڈیز کے مطابق پاکستان آئی ایم ایف سے 6.5 بلین ڈالر کے بیل آؤٹ پروگرام کو دوبارہ شروع کرنے کیلئے کوشش کر رہا ہے، جو حکومت کی جانب سے قرض کی کچھ شرائط کو پورا کرنے میں ناکام ہونے کے بعد رکا ہوا ہے۔
موڈیز کے تجزیہ کار گریس لیم نے بلومبرگ کو ایک ای میل کے جواب میں کہا کہ پاکستان کے زرمبادلہ کے ذخائر جو 4.5 ارب ڈالر ہیں انتہائی کم ہیں اور صرف ایک ماہ کی درآمدات کو پورا کرنے کیلئے کافی ہیں، تاہم جون کے بعد بھی آئی ایم ایف کے ساتھ بات چیت سے دیگر کثیرجہتی اور دوطرفہ شراکت داروں سے اضافی مالی اعانت میں مدد ملے گی، جس سے ڈیفالٹ کے خطرے کو کم کیا جاسکتا ہے۔
