کراچی ( نئی تازہ نیوز) سعودی عرب، قطر، موریطانیہ، سینیگال، ملائیشیا اورعمان سمیت 10 ممالک سے 48 گھنٹوں میں مزید 139 پاکستانی شہریوں کو بے دخل کر دیا گیا۔
امیگریشن ذرائع کے مطابق عراق میں غیر قانونی طور پر داخل ہونے اور زائد المیعاد قیام کے الزام میں 34 پاکستانیوں کو بے دخل کیا گیا، جن میں سے 2 افراد کو گوجرانوالہ پولیس کے حوالے کیا گیا۔
امیگریشن ذرائع نے بتایا کہ عمان سے 24 شہریوں کو غیر قانونی طور پر ملک میں داخل ہونے کی وجہ سے بے دخل کیا گیا، جن میں سے ایک شہری کا نام آئی بی ایم بلیک لسٹ میں شامل تھا، جسے اے ایچ ٹی سی منتقل کیا گیا، جبکہ دیگر 2 میں سے ایک کو لاڑکانہ اور دوسرے کو لاہور انتظامیہ کے حوالے کیا گیا۔
سعودی عرب میں بلیک لسٹ، منشیات، چوری، پاسپورٹ کے بغیر اور دیگر الزامات کے تحت 14 افراد کو ڈی پورٹ کیا گیا۔ انسانی اسمگلنگ سے بچائے گئے 3 افراد کو موریطانیہ اور 2 کو سینیگال سے ڈی پورٹ کیا گیا، جنہیں انسداد انسانی سمگلنگ ونگ نے حراست میں لے لیا۔
امیگریشن ذرائع نے یہ بھی بتایا کہ امارات میں منشیات، چوری، زائد المیعاد قیام، پاسپورٹ کھونے اور دیگر الزامات کے تحت سزا پانے والے 19 ملزمان سمیت 31 پاکستانیوں کو ڈی پورٹ کیا گیا۔
اس کے علاوہ ملائیشیا میں غیر قانونی امیگریشن کے الزام میں 8 پاکستانیوں کو واپس بھیجا گیا، جب کہ ادیس ابابا اور قطر سے 9 شہریوں کو رہائشی قوانین کی خلاف ورزی، مفرور ہونے، غیر قانونی کام کرنے یا اجر کی شکایت پر بے دخل کیا گیا۔
