اسلام آباد ( نئی تازہ رپورٹ) وفاقی کابینہ نے اہم اجلاس کے دوران آئین میں 26 ویں ترمیم کے مسودے کی منظوری دے دی ۔
وزیراعظم شہباز شریف کی زیرِ صدارت وفاقی کابینہ کا اجلاس اتوار کومنعقد ہوا ، جس میں وزیرِ قانون و انصاف نے 26 ویں آئینی ترمیم سے متعلق دوبارہ تفصیلی بریفنگ دی۔
وفاقی کابینہ نے پاکستان پیپلز پارٹی سمیت حکومتی اتحادی جماعتوں کا 26 ویں آئینی ترمیم کا مجوزہ مسودہ منظور کر لیا۔ وزیرِ اعظم نے اتحادی جماعتوں کے سربراہان کا شکریہ ادا کیا۔
وزیراعظم نے کہا کہ پوری قوم کو 26 ویں آئینی ترمیم کی کابینہ سے منظوری پر مبارکباد دیتا ہوں، کابینہ نے پاکستان کی ترقی و خوشحالی اور ملکی حالات کی بہتری کے لیےبہترین فیصلہ کیا۔
وزیراعظم آفس سے جاری بیان کے مطابق وزیراعظم نے کہا کہ کابینہ نے ملکی ترقی اور عوامی فلاح کے حلف کی پاسداری کرتے ہوئے ملک کے وسیع تر مفاد میں فیصلہ کیا، اللہ کے فضل و کرم سے ملکی معیشت کے استحکام کے بعد ملک کے آئینی استحکام اور قانون کی حکمرانی کے لیے ایک سنگ میل عبور ہوا۔ انہوں نے کہا کہ عوام سے کیے گئے اپنے وعدے کے مطابق ملک کی ترقی، خوشحالی اور استحکام کے لیے محنت جاری رکھیں گے۔
یہ بھی پڑھیں : پنجاب میں 15 اکتوبر سے سرکاری اسکولوں کے نئے اوقات کار کا نوٹیفکیشن جاری
اجلاس کے بعد گفتگو میں وفاقی وزیر مصدق ملک نے بتایا کہ حکومت نےآئینی ترمیم کا مسودہ منظور کر لیا ہے، کابینہ نے اس مسودے کی منظوری دی ہے جو پیپلزپارٹی، حکومت اور اتحادی جماعتوں نے مل کر بنایا۔
واضح رہے کہ وفاقی کابینہ کے اجلاس سے قبل وزیراعظم شہباز شریف اور صدر مملکت آصف علی زرداری کی ملاقات ہوئی جس میں آئینی ترمیم بارے تفصیلی مشاورت کی گئی اور صدر کو اعتماد میں لیا گیا۔
