اسلام اباد ( نئی تازہ رپورٹ) حکومت نے اسلام آباد کے اسکولوں میں سولر انرجی منصوبہ شروع کرنے کا فیصلہ کیا ہے۔
ترجمان وزارت تعلیم کے مطابق وفاقی دارالحکومت کے 100 پرائمری اسکولوں کو شمسی توانائی پر منتقل کیا جائے گا۔ اور اگلے 2 ماہ میں منصوبہ مکمل ہونے کی امید ہے۔
وزارت تعلیم کے حکام کے مطابق منصوبے کا مقصد بجلی کی لاگت کو کم کرنا ہے۔ جبکہ یہ اقدام قابل تجدید توانائی کے ذرائع کو استعمال میں لانے اور اسلام آباد کے کاربن فٹ پرنٹ کو کم کرنے کی ایک بڑی کوشش کا حصہ ہے۔ حکام کے مطابق یہ منصوبہ نہ صرف بجلی کی لاگت کو کم کرے گا بلکہ اسکولوں کے لیے توانائی کا ایک صاف ،پائیدار ذریعہ بھی فراہم کرے گا۔
منصوبے کے تحت منتخب اسکولوں کی چھتوں پر سولر پینلز کی تنصیب کی جائے گی۔ اورہر اسکول کی توانائی کی ضروریات کو پورا کرنے کے لیے شمسی توانائی کا نظام ڈیزائن کیا جائے گا۔ اس اقدام سے وزارت تعلیم کو بجلی اخراجات کی مد میں سالانہ کروڑوں روپے کے بچت ہو گی۔
