لندن ( نئی تازہ مانیٹرنگ) پاکستان نے آئی سی سی ٹی ٹوئنٹی ورلڈ کپ کیلئے 15 رکنی کرکٹ ٹیم کا اعلان کر دیا۔ ٹی 20 ورلڈکپ 2024ء کے لیے قومی ٹیم کا اعلان جمعہ کو قومی سلیکشن کمیٹی کی طرف سے لندن میں پریس کانفرنس کے دوران کیا گیا۔
سلیکشن کمیٹی کے مطابق امریکہ اور ویسٹ انڈیز میں 2 جون 2024 سےشروع ہونے والے آئی سی سی ٹی ٹوئنٹی ورلڈکپ میں پاکستانی ٹیم بابر اعظم کی قیادت میں شریک ہو گی۔
ٹی ٹوئنٹی ورلڈ کپ کیلئے 15 رکنی ٹیم میں کپتان بابر اعظم ، حارث رؤف ، عثمان خان، صائم ایوب ، محمد رضوان ، فخرزمان اورشاداب خان شامل ہوں گے ۔
پاکستانی سکواڈ میں اعظم خان، عماد وسیم ، افتخار احمد ، ابرار احمد ، عباس آفریدی، محمد عامر ، نسیم شاہ اورشاہین شاہ آفریدی کو بھی شامل کیا گیا ہے ۔
واضح رہے کہ عثمان خان، اعظم خان، ابرار احمد، عباس آفریدی اور صائم ایوب پہلی بار ٹی ٹوئنٹی ورلڈ کپ میں قومی ٹیم کی نمائندگی کریں گے۔
سلیکشن کمیٹی نے اعلان کردہ 15 رکنی اسکواڈ کو متوازن قرار دیا جس میں تجربہ کار اور نوجوان کرکٹرزکو شامل کیا گیا ہے، بتایا گیا ہے کہ حارث رؤف مکمل طور پر فٹ ہو چکے ہیں ۔
