خوشاب ( نئی تازہ مانیٹرنگ) خوشاب میں مزدوروں کا ٹرک بے قابو ہو کر کھائی میں جا گرا جس کے نتیجے میں ایک ہی خاندان کے 13 افراد جاں بحق ہوگئے۔
نجی ٹی وی نے ریسکیو ذرائع کے حوالہ سے بتایا کہ حادثہ پنجاب کےشہر خوشاب کے قریب پنج پیر مناواں روڈ پر بریک فیل ہوجا نے کی وجہ سے پیش آیا اور ٹرک بے قابو ہو کر کھائی میں جا گرا۔
ریسکیو ذرائع کے مطابق حادثے میں 13 افراد جاں بحق ہوئے جن میں خواتین بھی شامل ہیں جبکہ 9 افراد کو زخمی حالت میں ہسپتال منتقل کیا گیا ہے۔
میڈیا رپورٹ کے مطابق تمام جاں بحق ہونے والے افراد ایک ہی خاندان سے تعلق رکھتے تھے ، بتایا گیا ہے کہ متاثرہ خاندان کے افراد بنوں سے مزدوری کے لیےٹرک میں سوار ہو کر خوشاب آرہے تھے کہ حادثہ کا شکار ہو گئے۔
ریسکیو ذرائع کے مطابق حادثے میں 9 افراد زخمی بھی ہوئے ہیں جنہیں طبی امداد کے لیے نوشہرہ ٹی ایچ کیو ہسپتال منتقل کر دیا گیا ہے ، تین افراد شدید زخمی بتائے گئے ہیں۔
