اسلام آباد ( نئی تازہ رپورٹ) وزارت داخلہ نے ججز کے خلاف سوشل میڈیا پر جاری مہم کا نوٹس لیتے ہوئے ذمہ داروں کے خلاف کارروائی کے لیے جے آئی ٹی تشکیل دے دی۔
میڈیا رپورٹ کے مطابق وزارت داخلہ نے سپریم کورٹ کے ججوں کے خلاف سوشل میڈیا پر جاری مہم کا نوٹس لیتے ہوئے ذمہ داروں کی نشاندہی کرنے اور اس کی روک تھام کی تجاویز دینے کے لیے جے آئی ٹی بنادی ہے۔ جس کا نوٹیفیکیشن جاری کر دیا گیا ہے۔
نوٹیفیکیشن کے مطابق 6 رکنی مشترکہ تحقیقاتی ٹیم( جے آئی ٹی ) کے سربراہ ایڈیشنل ڈائریکٹر ایف آئی اے سائبر کرائم ونگ ہوں گے اور اس میں آئی ایس آئی، آئی بی ، پولیس اور پی ٹی اے کے نمائندے شامل ہوں گے۔
تحقیقاتی کمیٹی میں کم ازگریڈ 20 کے آئی بی اور آئی ایس آئی کے رکن اورڈی آئی جی اسلام آباد پولیس بھی بطور رکن شامل ہوں گے جبکہ پاکستان ٹیلی کمیونیکیشن اتھارٹی( پی ٹی اے) کا بھی ایک رکن کمیٹی کا حصہ ہو گا۔
کمیٹی سپریم کورٹ ججز کے خلاف سوشل میڈیا پر جاری مذموم مہم میں ملوث ذمہ داران کا تعین کرے گی جبکہ ایسے واقعات کی روک تھام کے لیے تجاویز بھی مرتب کرے گی۔ کمیٹی 15 روز میں رپورٹ وزارت داخلہ کو جمع کرائے گی۔
