دبئی ( نئی تازہ مانیٹرنگ) مسلم لیگ (ن) کے قائد نواز شریف دبئی سےخصوصی طیارے کے ذریعے پاکستان پہنچیں گے ۔
پارٹی ذرائع کے مطابق نواز شریف کی وطن واپسی کیلئے دبئی سے خصوصی طیارہ بُک کرایا گیا ہے ، معلوم ہوا ہے کہ طیارے میں تقریباً 150 افراد کی گنجائش ہے۔
نجیتی وی نے ذرائع کے حوالے سے بتایا کہ نواز شریف عمرے کی ادائیگی کیلئے کل بدھ کو لندن سے سعودی عرب روانہ ہوں گے، جہاں وہ تقریباً ایک ہفتہ قیام کریں گے ، اس دوران وہ سعودی حکام سے ملاقاتیں کریں گے ،سابق وزیراعظم سعودی عرب سے 17 یا 18 اکتوبر کو دبئی پہنچیں گے۔
بتایا گیا ہے کہ نواز شریف کی دبئی میں بھی کئی ملاقاتیں طے ہیں، دبئی میں 3 روز قیام کے بعد سابق وزیراعظم 21 اکتوبر کولاہور کیلئے روانہ ہوں گے۔
ذرائع نے بتایا کہ نواز شریف 21 اکتوبر کو پاکستان جانے کیلئے دبئی سے پارٹی کارکنوں اور صحافیوں کے ساتھ روانہ ہوں گے، خصوصی پرواز کو امید پاکستان کا نام دیا جائے گا جو دبئی سے اسلام آباد پہنچے گی اور30 منٹ بعد لاہور کیلئےروانہ ہوگی ، لاہور میں طیارے سے اتر کر نواز شریف گاڑیوں کے قافلے کے ہمراہ مینار پاکستان جائیں گےاورجلسے سے خطاب کریں گے۔
