وفاقی وزیر خزانہ سینیٹر اسحاق ڈار نے گیس سیکٹر میں گردشی قرضوں کا مسئلہ جلد از جلد حل کیلئے رپورٹ اور ایکشن پلان کو حتمی شکل د ینے کی ہدایت کردی۔
وفاقی وزیر خزانہ کی زیر صدارت توانائی شعبہ میں اصلاحات بارے کمیٹی اجلاس منعقد ہوا، اجلاس میں وزیرمملکت برائے خزانہ ڈاکٹر عائشہ غوث پاشا، وزیرمملکت برائے پٹرولیم مصدق ملک، وزیراعظم کے معاون خصوصی برائے خزانہ طارق باجوہ، معاون خصوصی برائے ریونیو طارق محمود پاشا، کمیٹی کے چیئرمین اشفاق یوسف تولہ، ایس ای سی پی کے چیئرمین، کنٹرولر جنرل پاکستان، اکا ئونٹنٹ جنرل پاکستان اور خزانہ اور پٹرولیم ڈویژن کے افسران موجود تھے۔
اجلاس کوکمیٹی کے چیئرمین اشفاق یوسف تولہ نے گیس سیکٹر میں گردشی قرضہ کی تفصیل اور توانائی کے شعبہ میں گردشی قرضہ کا بوجھ کم کرنے کیلئے اصلاحات متعارف کرانے کے طریقہ کار اور فریم ورک کے بارے میںآگاہ کیا، اجلاس کے دوران ملک میں اقتصادی ترقی کے حصول کیلئے توانائی کے شعبہ میں استحکام کے حوالہ سے قابل عمل تجاویز زیر غور لائی گئیں۔
وزیرخزانہ نے گردشی قرضے کے حل کی حکومتی ترجیحات پر عمل درآمد سمیت توانائی کے شعبہ کے مسائل حل کرنے پر زور دیا تا کہ اس شعبہ کے مالی استحکام اور اقتصادی ترقی کویقینی بنایا جاسکے۔
وزیر خزانہ نے ہدایت کی کہ کمیٹی گیس کے شعبہ میں گردشی قرضوں کا مسئلہ فوری حل کرنےکیلئے اپنی رپورٹ اور ایکشن پلان کو حتمی شکل دے۔
