لاہور ( نئی تازہ رپورٹ) پاکستان تحریک انصاف کے چیئرمین عمران خان نے کہاہے کہ اگر مجھے نا اہل کر دیا گیا تو لوگ تب بھی تحریک انصاف کے نظریے کو ووٹ دیں گے، پی ڈی ایم مشترکہ طورپر عوام کے سامنے بے نقاب ہورہی ہے،عام انتخابات کی تاریخ کا اعلان نہ بھی ہوا تو سڑکوں پر احتجاج کا کوئی آپشن زیر غور نہیں۔
لاہور میں سینئر صحافیوں سے ملاقات کے دوران عمران خان نے کہا کہ صرف تحریک انصاف کی حکومت ہی ملک کو ان بحرانوں سے نجات دلا سکتی ہے۔ پی ڈی ایم مشترکہ طورپر عوام کے سامنے بے نقاب ہورہی ہے، ان کے پاس عوام کو دینے کے لئے کچھ نہیں۔ پاکستان تحریک انصاف کے چیئرمین نے کہاکہ گورنر پنجاب بلیغ الرحمن نے اسمبلی تحلیل کے بعد بھیجی گئی ایڈوائس میں انتخابات کی تاریخ نہ لکھ کر آئین کی خلاف ورزی کی۔ اس اقدام کو عدالتوں میں چیلنج کر یں گے۔
ابھی بہت سے کارڈ موجود ہیں
عمران خان نے کہاکہ پنجاب اسمبلی کی تحلیل کا شاٹ کھیلنے کے بعدمیرے پاس ابھی بہت سے ایسے کارڈ موجود ہیں جب کھیلوں گا تو پی ڈی ایم والوں کے رونگٹھے کھڑے ہوجائیں گے۔
عمران خان نے خبردار کیاکہ اگر صاف شفاف انتخابات نہ ہوئے تو ملک میں سری لنکا جیسی صورتحال پیدا ہوسکتی ہے لیکن اس کے ساتھ ہی کہا کہ اگر عام انتخابات کی تاریخ کا اعلان نہ بھی ہوا تو سڑکوں پر احتجاج کا کوئی آپشن زیر غور نہیں۔عمران خان نے اسحاق ڈار کو ساری تباہی کا ذمہ دار قرار دیتے ہوئے کہا کہ مسلم لیگ ن کے اندر توڑ پھوڑ سے متعلق آوازیں سننے کو مل رہی ہیں۔
