کراچی ( نئی تازہ رپورٹ) کراچی بورڈ آف سیکنڈری ایجوکیشن نے 28 مئی کو یوم تکبیر کی وجہ سے ملتوی ہونے والے پیپرز اتوار 2 جون کولینے کا اعلان کیا ہے۔
قائم مقام ناظم امتحانات خالد احسان نے کہا ہے 28مئی کو ملک بھر میں یوم تکبیرپرعام تعطیل ہونے کی وجہ سے جوپیپرز ملتوی کیے گئے وہ اب اتوار 2 جون 2024 کوہوں گے۔
ذرائع کے مطابق یکم جون 2024 سے کراچی بورڈ کے انٹر میڈیٹ کے امتحانات شروع ہو رہے ہیں ، کچھ امتحانی مراکز میں بیک وقت میٹرک اور انٹرمیڈیٹ کے امتحانات ہوں گے، اس لیے ملتوی شدہ پرچہ اتوار کے روز2 جون کومقررہ امتحانی مراکز پر لینے کا فیصلہ کیا گیا ہے۔
شیڈول کے مطابق صبح کی شفٹ میں 9 ویں جماعت سائنس گروپ ارد و لازمی نارمل کورس، سندھی لازمی نارمل کورس ، جغرافیہ آف پاکستان (پرچہ اول)، انگریزی ادب متبادل برائے اردو لازمی کا امتحان ہوگا ، اسی طرح شام کی شفٹ میں جنرل گروپ 10 ویں جماعت کا عربی (پرچہ دوم)، فارسی (پرچہ دوم)، حسابات خانہ داری اور متعلقہ مسائل (پرچہ دوم) کا امتحان گا۔
