دیامر ( نئی تازہ مانیٹرنگ) گلگت بلتستان کے ضلع دیامر میں تیزرفتار بس گہری کھائی میں گرنے کے نتیجے میں 20 مسافر جاں بحق اور متعدد زخمی ہوگئے۔
میڈیا رپورٹ کے مطابق گونر فارم کے قریب راولپنڈی سے ہنزہ جانے والی تیز رفتار مسافر بس کھائی میں جا گری، بس میں 40 سے زائد مسافر سوار تھے۔
صوبائی حکومت کے ترجمان فیض اللہ فراق کے مطابق بس کو حادثہ صبح 5 بجےکے قریب پیش آیا، حادثے کا شکار بس راولپنڈی سے 40 سے زائد مسافروں کو لے کر روانہ ہوئی تھی۔
ترجمان نے بتایا کہ بدقسمت بس یشوکھل کے قریب موڑ کاٹتے ہوئے ڈرائیور سے بے قابو ہوکر گہری کھائی میں جا گری، بس میں سوار خواتین اور بچوں سمیت 20 مسافر جاں بحق جبکہ 21 زخمی ہوگئے ،ریسکیوکی ٹیمیں جائے وقوعہ پر پہنچ گئیں اور ریسکیو آپریشن جاری ہے۔ زخمی ہونے والے مسافروں کو ریجنل ہیڈکوارٹر ہسپتال منتقل کردیا گیا ہے۔
