کراچی: پاکستان انٹرنیشنل ایئرلائنز (پی آئی اے) نے اعلان کیا ہے کہ وہ 20 اپریل سے لاہور سے آذربائیجان کے دارالحکومت باکو کے لیے براہ راست پروازیں شروع کرے گی۔
پی آئی اے کی جانب سے لاہور سے باکو کے لیے ہر ہفتے دو پروازیں روانہ کی جائیں گی، جو اتوار اور بدھ کے دن چلائی جائیں گی۔
اس ضمن میں کراچی میں ایک خصوصی تقریب کا اہتمام کیا گیا، جس میں ٹریول ایجنٹس اور ٹور آپریٹرز کو مدعو کیا گیا۔ اس تقریب کے دوران باکو پروازوں سے متعلق تفصیلی معلومات فراہم کی گئیں۔
پی آئی اے حکام کے مطابق باکو کے لیے نئی پروازیں سیاحت اور دو طرفہ تجارتی روابط کو فروغ دینے میں مددگار ثابت ہوں گی، جب کہ اس روٹ کی کامیابی میں ٹریول ایجنٹس کا کردار بھی انتہائی اہم ہوگا۔
قومی ایئرلائن نے اس عزم کا اظہار کیا ہے کہ وہ باکو روٹ کو تجارتی لحاظ سے کامیاب بنانے کے لیے بھرپور اقدامات کرے گی۔
