اسلام آباد ( نئی تازہ رپورٹ) وفاقی وزیر رانا تنویر حسین نے کہا ہے کہ یوٹیلیٹی اسٹورز کی تنظیم نو کے لیے کئی نجی کمپنیاں دلچسپی کا اظہار کر رہی ہیں ، کارپوریشن کے مستقبل کا حتمی فیصلہ آئندہ اجلاس میں کیا جائے گا۔
وفاقی وزیر رانا تنویر حسین کی زیر نگرانی یوٹیلیٹی اسٹورز کارپوریشن کے حوالے سے ایک اعلیٰ سطح کا اجلاس منعقد ہوا، اجلاس میں وزیر برائے انفارمیشن ٹیکنالوجی شیزا فاطمہ نے بھی شرکت کی اور اہم تجاویز پیش کیں۔
اجلاس کے دوران یوٹیلیٹی اسٹورز کے حوالے سے وزیراعظم کی ہدایات پر عمل درآمد کے لیے مشاورت کی گئی اور اس کے مستقبل کے لائحہ عمل پر غور کیا گیا۔ اجلاس میں یوٹیلیٹی اسٹورز کی بندش کے عمل میں تیزی لانے کے لیے ضروری اقدامات اور حکمت عملی پر تبادلہ خیال کیا گیا۔
یوٹیلیٹی اسٹورز کے ملازمین اور آؤٹ لیٹس کی پروڈکٹیویٹی کو بہتر بنانے کے لیےخصوصی کمیٹی تشکیل دی گئی ۔ اجلاس کے دوران بتایا گیا کہ یوٹیلیٹی اسٹورز کی تنظیم نو کے لیے کئی نجی کمپنیاں دلچسپی کا اظہار کر رہی ہیں۔
وفاقی وزیر رانا تنویر حسین نے کہا کہ یوٹیلیٹی اسٹورز کارپوریشن کے حوالے سے تمام فیصلے شفافیت کے ساتھ کیے جائیں گے اوراس معاملہ میں عوامی مفاد کو اولین ترجیح دی جائے گی۔ جبکہ یوٹیلیٹی اسٹورز کارپوریشن کے مستقبل کا حتمی فیصلہ آئندہ اجلاس میں کیا جائے گا
