لاہور ہائیکورٹ نے وزیراعظم شہباز شریف کے ہرجانے کے دعوے سے متعلق کیس میں بانی پی ٹی آئی عمران خان کی درخواست ناقابل سماعت قرار دے دی۔
لاہور ہائی کورٹ کے جسٹس چودھری محمد اقبال نے پاکستان تحریک انصاف کے بانی عمران خان کی درخواست پر محفوظ فیصلہ سنا دیا۔ بانی پی ٹی آئی نے گواہوں کوتحریری گواہی کی اجازت دینے کے خلاف درخواست دائر کی تھی جسے عدالت نے ناقابل سماعت قرار دیدیا۔
گزشتہ روز ہائی کورٹ نے وزیراعظم شہباز شریف کی جانب سے عمران خان کے خلاف ہرجانے کے دعوے کے کیس میں گواہوں کو تحریری گواہی دینے کی اجازت کیخلاف بانی پی ٹی آئی کی ٹرائل کورٹ میں درخواست پر سماعت کی۔
یہ بھی پڑھیں :حکومت کا فیڈرل بورڈ کے ٹاپ 120 طلبہ و طالبات کو مفت الیکٹرک بائیکس دینے کا اعلان
بانی پی ٹی آئی نے درخواست میں مؤقف اختیار کیا تھا کہ ٹرائل کورٹ نے ہتک عزت کے دعوے میں گواہوں کو تحریری صورت میں گواہی کی اجازت دی ہے، یہ فیصلہ حقائق کے برعکس ہے، گواہ کمرہ عدالت میں پیش ہو کر گواہی دیں۔
درخواست میں عدالت سے استدعا کی گئی تھی کہ ٹرائل کورٹ کا فیصلہ کالعدم قرار دیا جائے جسے عدالت نے ناقابل سماعت قرار دے دیا۔
