اسلام آباد ( نئی تازہ رپورٹ) سپریم کورٹ کے آئینی بینچ نے آرمی چیف کی مدت ملازمت میں توسیع کے خلاف درخواست سماعت کیلئے مقرر کردی۔
نجی ٹی وی چینل کی رپورٹ کے مطابق سپریم کورٹ کے آئینی بینچ نے آڈیو لیکس کمیشن کی تشکیل اور آرمی چیف کی مدت ملازمت میں توسیع کے خلاف دائر درخواستیں سماعت کے لیے مقرر کر دی ہیں۔
سپریم کورٹ کے جسٹس امین الدین خان کی سربراہی میں سات رکنی آئینی بینچ 20 نومبر کو آرمی چیف کی مدت ملازمت میں توسیع کے خلاف درخواست کی سماعت کرے گا، جبکہ آڈیو لیکس کمیشن کی تشکیل کے خلاف درخواست کی سماعت 21 نومبر کو ہوگی۔
آئینی بینچ میں جسٹس امین الدین خان کے علاوہ جسٹس جمال خان مندو خیل، جسٹس محمد علی مظہر، جسٹس عائشہ ملک، جسٹس حسن اظہر رضوی، جسٹس مسرت ہلالی اور جسٹس نعیم اختر افغان شامل ہوں گے۔
واضح رہے کہ آرمی چیف کی مدت ملازمت میں توسیع کے خلاف درخواست محمود اختر نقوی نے دائر کی تھی، جبکہ آڈیو لیکس کمیشن کے خلاف صدر سپریم کورٹ بار عابد زبیری اور سیکریٹری بار مقتدر اختر شبیر نے درخواستٰں دائرکر رکھی ہیں، بانی پی ٹی آئی عمران خان اور وکیل حنیف راہی کی جانب سے بھی اس حوالے سے درخواست دائر کی گئی ہے۔
یاد رہے کہ رواں ماہ کے آغاز میں پارلیمنٹ نے مسلح افواج کے سربراہان کی مدت ملازمت 3 سال سے بڑھا کر 5 سال کرنے کے حوالے سے ترمیمی بل منظور کیا تھا، جس پر بعد ازاں قائم مقام صدر سید یوسف رضا گیلانی نے دستخط کیے تھے۔
