پشاور: خیبرپختونخوا حکومت نے مفت سولر پینل اسکیم کا آغاز کر دیا ہے، ایک لاکھ 30 ہزار گھرانوں کو مفت سولر سسٹم فراہم کیا جائے گا۔
میڈیا رپورٹ کے مطابق یہ سہولت احساس پروگرام اور بے نظیر انکم سپورٹ پروگرام میں رجسٹرڈ مستحق گھرانوں کو دی جائے گی۔
سولر اسکیم کے تحت صوبہ بھر کے ایک لاکھ 30 ہزار گھرانوں کو مفت سولر سسٹم کی فراہمی عمل میں لائی جائے گی۔
پہلے مرحلے میں 32 ہزار 500 مستحقین کو قرعہ اندازی کے ذریعے سولر سسٹم دیا جائے گا، جس میں بجلی سے محروم اور شدید متاثرہ علاقوں کو ترجیح دی جائے گی۔ اسکیم میں یتیم، بیوہ، معذور افراد اور خواجہ سرا بھی شامل ہوں گے۔
قرعہ اندازی میں منتخب ہونے والے افراد کو سولر پینل، کنٹرولر، بلب، پنکھا اور بیٹری فراہم کی جائے گی۔
وزیراعلیٰ خیبرپختونخوا علی امین گنڈاپور کے مطابق صوبے میں بجلی کے مسائل کے پیش نظر سولر سسٹم متعارف کرایا جا رہا ہے۔ ایک لاکھ 32 ہزار افراد کو مفت سولر سسٹم دیا جائے گا، ڈی آئی خان کے لوگوں نے سب سے زیادہ درخواستیں جمع کرائی ہیں، تاہم تقسیم میرٹ پر ہوگی۔
انہوں نے کہا کہ تمام اراکینِ اسمبلی کو ہدایت کی گئی ہے کہ قرعہ اندازی کے ذریعے مستحقین کا انتخاب کیا جائے گا۔ مقابلہ کارکردگی کی بنیاد پر ہونا چاہیے، اور خیبرپختونخوا ہمیشہ سے اس میں آگے رہا ہے۔
