وزارت خزانہ نے مختلف قومی بچت اسکیموں کی شرح منافع میں کمی کردی ہے، وزارت خزانہ کی طرف سے بچت اسکیموں کے منافع میں کمی کا نوٹیفکیشن جاری کردیا گیا۔
نوٹیفکیشن کے مطابق نئی شرح کا اطلاق 25 ستمبر 2024 سے ہوگا۔
وزارت خزانہ کے نوٹیفکیشن کے مطابق سیونگ، اسپیشل سیونگ اکاؤنٹ، ڈیفنس سیونگ اسکیمزمیں شرح منافع کم کی گئی ہے ، اسی طرح ریگولر انکم سرٹیفکیٹ اور بہبود سیونگ سرٹیفکیٹ پر بھی اب کم منافع ملے گا۔
نوٹیفکیشن کے مطابق پنشنرز اور شہدا فیملی ویلفیئر اکاؤنٹس پر دیا جانے والا سالانہ منافع بھی کم کردیا گیا ہے۔
پنشنرز بینیفٹ اور شہدا فیملی ویلفیئر اکاؤنٹس کی شرح منافع 15.36 فیصد سے کم کر کے 14.16 کر دی گئی ہے جبکہ بہبود سیونگ سرٹیفکیٹ کی سالانہ شرح منافع بھی کم کرکے 14.16 فیصد کر دی گئی ہے اسی طرح ریگولر انکم سرٹیفکیٹ پر منافع کی شرح 14.52 سے کم کر کے 12.72 فیصد کردی گئی ہے۔
یاد رہے کہ سٹیٹ بینک نے حال ہی میں پالیسی ریٹ میں دو فی صد کمی کی تھی جس کے بعد پالیسی ریٹ 19.5 فی صد سے 17.5فی صد پر آگیا ہے۔
