معروف آن لائن ٹیکسی سروس اوبر نے لاہور میں بھی اپنی سروس بند کرنے کا اعلان کر دیا۔ جس کے بعد پاکستان بھر میں کمپنی کی سروسز کا اختتام ہو گیا۔
اوبر نے پاکستان میں اپنے صارفین کو مطلع کیا کہ کمپنی 30 اپریل 2024 سے لاہور میں اپنی سروسز ختم کر رہی ہے۔صارفین کو بھیجے گئے پیغام میں بتایا گیا ہے کہ اوبرپاکستان میں اپنی خدمات اپنی ذیلی کمپنی ’ کریم‘ کے ذریعے جاری رکھے گی جس پر رجسٹریشن کروا کر صارفین سروسز حاصل کرسکتے ہیں۔
واضح رہے کہ اوبر Uber نے مارچ 2019 میں مشرق وسطیٰ میں اپنی حریف کمپنی کریم کو 3.1 ارب ڈالر میں خرید لیا تھا۔
اس معاہدے کے تحت، کریم، اوبرکی مکمل ملکیتی ذیلی کمپنی بن گئی لیکن اپنی برانڈنگ، خدمات اور علیحدہ ایپ کے ساتھ آزادانہ طور پر کام جاری رکھے ہوئے ہے۔
یاد رہے کہ اوبر نے اکتوبر 2022 میں پاکستان کے 5 بڑے شہروں کراچی، اسلام آباد، فیصل آباد، ملتان اور پشاور میں اپنی خدمات بند کرنے کا اعلان کیا تھا۔ تاہم اس وقت کمپنی نے لاہور میں کام جاری رکھنے کا فیصلہ کیا تھا۔ جاری بیان میں کہا گیا تھا کہ یہ اوبر کی ٹیموں کے لیے ایک مشکل وقت ہے جنہوں نے چند برسوں میں اس کاروبارکے فروغ کے لیے ناقابل یقین حد تک محنت کی۔
