اسلام آباد (نئی تازہ رپورٹ) اسلام آباد پولیس نے کہا ہے کہ ایف نائن پارک میں خاتون سے مبینہ زیادتی کے دونوں ملزمان کو گرفتار کرلیا گیا۔ گرفتاری سیف سٹی کیمروں کی مدد سے عمل میں آئی، ملزمان کا تعلق صوابی سے ہے۔
نجی ٹی وی نے پولیس کے حوالے سے بتایا کہ ملزمان کو اسلام اباد کے تھانہ گولڑہ کی حدود سے گرفتار کیا گیا ہے اور ملزمان نے اقبال جرم بھی کرلیا ہے۔ متاثرہ خاتون نے ملزمان کو شناخت کر لیا ہے۔ خاتون سے زیادتی کے واقعے کا مقدمہ تھانہ مارگلہ میں درج کیا گیا تھا۔
پولیس ذرائع کے مطابق ملزمان کی گرفتاری سیف سٹی کیمروں کی مدد سے عمل میں آئی اور ملزمان کا تعلق صوابی سے ہے۔پولیس ذرائع کے مطابق متاثرہ خاتون نے بھی ملزمان کو شناخت کر لیا ہے۔
یاد رہے کہ رواں ماہ اسلام آباد کے ایف 9 پارک میں لڑکی کے ساتھ مبینہ طور پر اجتماعی زیادتی کا واقعہ پیش آیا تھا۔
لڑکی ہواخوری کیلئے دوست کے ساتھ پارک گئی تھی جہاں موجود مسلح افراد اس کو الگ لے گئے، جان سے مارنے کی دھمکی دی، شور کرنے پر تھپڑ مارے، درختوں کے جھنڈ میں لے جا کر تشدد کیا، کپڑے پھاڑ ڈالے اور زیادتی کا نشانہ بنایا تھا۔
