مانسہرہ ( نئی تازہ مانیٹرنگ) جنگلی ریچھ نے بالا کوٹ کے قریبی علاقہ میں حملہ کر کے 35 سالہ خاتون کی جان لے لی۔
میڈیا رپورٹ کے مطابق واقعہ جمعرات کو صبح 8 بجے کے قریب پیش آیا جب خیبر پختونخوا کے علاقہ بالاکوٹ میں ریچھ نے حملہ ایک خاتون کو جان سے مار ڈالا۔
پولیس کے مطابق بالاکوٹ کے علاقے جگن میں ایک ریچھ نے حملہ کرکے رضیہ نامی خاتون کو شدید زخمی کردیا ۔ خاتون کو زخمی حالت میں بالاکوٹ ہسپتال پہنچایا گیا جنہیں ڈاکٹروں نے مانسہرہ ہسپتال ریفر کر دیا، تاہم وہ زخموں کی تاب نہ لاتے ہوئے راستے میں ہی انتقال کر گئی۔
پولیس کے مطابق جاں بحق ہونے والی 35 سالہ خاتون 3 بچوں کی ماں تھی۔ اور سب سے چھوٹی بچی دو ماہ قبل پیدا ہوئی تھی۔
میڈیا رپورٹ میں لواحقین کے حوالے سے بتایا گیا ہے کہ علاقے میں ریچھ کے حملوں میں اضافہ ہوگیا ہے، اور جنگلی جانوروں کے حملوں میں انسانی جانوں کا ضیاع ایک معمول بن چکا ہے، انہوں نے کہا کہ حکام سے اپیل ہے کہ وہ جنگلی جانوروں کو رہائشی علاقوں سے دور رکھنے کے لئے اقدامات کریں اور اس سلسلہ میں ایک موثر حکمت عملی بنائی جائے۔
