اسلام آباد( نئی تازہ ڈیسک) ڈائریکٹوریٹ آف نیشنل سیونگز (سی ڈی این ایس) نے قومی بچت کی مختلف اسکیموں پر منافع کی شرح میں کمی کر دی ہے۔
سی ڈی این ایس کے مطابق اسپیشل سیونگ سرٹیفکیٹس کی منافع کی شرح میں 20 بیسز پوائنٹس کی کمی کے بعد یہ 11.20 فیصد سے کم ہو کر 11 فیصد ہو گئی ہے۔ شارٹ ٹرم سیونگ سرٹیفکیٹس پرشرح 33 بیسز پوائنٹس کی کمی کے بعد 11.13 فیصد سے گھٹ کر 10.80 فیصد جبکہ ڈیفنس سیونگ سرٹیفکیٹس پر ایک بیسز پوائنٹ کی کمی کے بعد 12.15 فیصد سے کم ہو کر 12.14 فیصد ہو گئی ہے۔
اسی طرح سیونگ اکاؤنٹس پر 20 بیسز پوائنٹس کی کمی کے بعد منافع 11.20 فیصد سے کم ہو کر 11 فیصد ہو گیا، پنشنرز بینیفٹس اکاؤنٹس اور شہداء فیملی ویلفیئر اکاؤنٹس پر 10 بیسز پوائنٹس کمی کے بعد منافع 13.68 فیصد سے گھٹ کر 13.58 فیصد ہو گیا ہے۔
سروا اسلامی ٹرم اکاؤنٹس کی منافع کی شرح میں 16 بیسز پوائنٹس کمی کی گئی جس کے بعد یہ 9.90 فیصد سے کم ہو کر 9.74 فیصد جبکہ سروا اسلامی سیونگ اکاؤنٹس پر بھی اتنی ہی کمی کے بعد 9.90 فیصد سے گھٹ کرشرح منافع 9.74 فیصد ہو گئی ہے۔ واضح رہے کہ نئی شرحوں کا اطلاق 25 فروری سے کیا گیا ہے۔
یاد رہے کہ گورنر اسٹیٹ بینک نے گذشتہ ماہ مانیٹری پالیسی کا اعلان کرتے ہوئے شرح سود میں ایک فیصد کمی کا فیصلہ کیا تھا جس کے بعد شرح سود 12 فیصد ہوگئی۔
